సనాతన ధర్మమునందు స్తోత్ర పఠనము కేవలము ఇహము నందు కోరికలను ఈడేర్చగలిగిన సాధనము గానే కాక భగవంతుని యందు భక్తి కుదురుకుని కడకు ఆయనను చేరుటకు సాధనముగా పరిగణింపబడినది. అటువంటి స్తోత్రములను కొన్నిటిని పరదేవత యొక్క అనుగ్రహముతో తెలుగులో ఈ వెబ్ సైట్ నందు సంకలనం చేయబడినది.

దేవతలు, ఋషులు, గురువులు మనని అనుగ్రహించి ఇచ్చినవే స్తోత్రములు. ప్రతి ఒక్క స్తోత్రము తప్పులు లేకుండా, భక్తితో చదివినప్పుడు ఒక గొప్ప ఆనందానుభూతి కలుగుతుంది. ఆ అనుభూతిని చదివిన ప్రతి ఒక్కరు పొందాలి అన్న ఆలోచనతో సాధ్యమైనంతవరకు స్తోత్రములను కూర్చటంలో శ్రద్ధ తీసుకోవటం జరిగినది, అయిన తప్పులు ఉండి ఉండవచ్చు. అటువంటివి ఉండి ఉంటే నన్ను మన్నించగలరు. ఈ రోజులలో మనము తెలుగులో మాట్లాడుతున్నప్పటికీ, అనేక విషయములను చదవటం గాని, రాయటం గాని ఇంగ్లీషు భాషలోనే చేయటం జరుగుతోంది. ఆ కారణం చేత తెలుగులో చదువుకోవటానికి ఇబ్బంది కలిగినవారికోసం, ప్రతి స్తోత్రమును పఠించిన ఆడియో కుడా ఉంచబడినది. దానిని వింటూ స్తోత్రములను తెలుగులో చదువుకోగలుగుతారని ఆశిస్తున్నాను. ఈ వెబ్ సైట్ నందున్న స్తోత్రములను యూట్యూబ్ వీడియోలుగా తయారుచేసి మా “శ్రీమాతా” యూట్యూబ్ ఛానెల్ నందు పొందుపరచటమైనది.మీరు అక్కడ కూడా చదువుకోగలరు మరియు వినగలరు.

ఈ నా చిన్న ప్రయత్నములో నన్ను ఎంతగానో ప్రోత్సహించి ఈ వెబ్ సైట్ ను రూపొందించిన నా భర్తకు కృతజ్ఞతలు.మమ్మల్ని ఆశీర్వదించి ముందుకు నడిపించే గురువులకు, పెద్దలకు నా నమస్కారములు.పరమేశ్వరుని పాదాల యందు బాయని భక్తిని,సనాతన ధర్మమునందు చెదిరిపోని గౌరవాన్ని ప్రసాదించమని భగవతిని వేడుకుంటూ సెలవు తీసుకుంటున్నాను.

|| సర్వేజనాః సుఖినోభవన్తు ||

మీ సలహాలు, సూచనలు మాకు తెలుపుట కొరకు stotramulu@gmail.com నకు వ్రాయగలరు.

https://sanskritdocuments.org/: వారికి మా హృదయపూర్వక ధన్యవాదములు

ఇట్లు,
లక్ష్మి కుమారి.బి